Programwaat is oet
Alt text

Prinsebal


Òse Prins geit ein gans Vastelaovessezoen veurop. Det beteikent det d’r zo vreug meugelik oetgerope mot waere. Volges good gebroek is det dan auch op de ierste zoaterdig nao de ellefde vanne ellefde.

Hawt dees site, òs Facebook pagina of ‘t Posters Waekblaad good inne gate veur de exacte datum!

nao baove

Bontje Aovend


De naam zaet ‘t al gans, de Bontje Aovend sjteit garant veur divers vermaak in de geis vanne Vastelaovend. De aovend waert gedomineerd door een paar gooi buute en väöl zang en dans. Vier probere jidder jaor ein sjoon program veur uch neer te zitte met artiesten van versjillend pluimaasj.

Hawt dees site, òs Facebook pagina of ‘t Posters Waekblaad good inne gate veur de exacte datum!

nao baove

Recepsie


Daags nao de Bontje Aovend hilt òse Prins zien recepsie. Jidderein is welkom om hem te felicitere en eine sjoone Vastelaovend te wunsje, zo wie vier auch haope det jidderein eine sjoone Vastelaovend moog hubbe.

nao baove

Vastelaoves vriedig


De vriedigaovend is de aovend det de Burgemeister de mach, zij ‘t tiedelik, euverdreug aan de Prinse van de respectievelikke dörpe. In Postert haole vier de Prins en zien Prinses heim op, om vervolges same met ein van de zaate hermenieje nao ‘t gemindehoes te gaon, wo de offisjieel sleuteleuverdrach plaats haet. Nao aaflaup gaon vier natuurlik nag efkes ‘t dörp in.

nao baove

Vastelaoves zaoterdig


Eine daag dae provinciewied in ‘t teike sjteit van massale bie-einkomste, zo wie de stasiefestasie en de boetegewoene boetezitting, waert bie òs bepaald door eine gezellige, kleinsjaolige en dus intieme aovend: ‘t A-socialiste konkoer.
Ein aope podium veur jidderein dae ein mop wilt vertèlle, ein buut wilt doon, ein liedje wilt zinge of ein denske of ein kleine sketch wilt doon. Zo good es alles is meugelik es ‘t mer joeksig is.

nao baove

Vastelaoves zunjig


De daag veur de jeug! Sjmiddigs ein sjoon program onger leiding van de jongste raod van ‘t dörp, KCV De Feesnaeskes. De middig haet jidder jaor ein eige thema, compleet met rondjgank door ‘t dörp. Es aafsloeter is d’r ein ballonewedstrijd wobie sjoon prieze gewonne kinne waere, mede meugelik gemak doer de Posterse middestandj.
Saoves zwejt de Prins van òse jeugroad, JCV De Dorsjvlaegels, de scepter inne Dorssjuur (doer ‘t jaor bekind es ‘t KA-Hoes). Die men sjtaon jidder jaor wier garant veur ein deftig feesje.

nao baove

Vastelaoves maondjig


Geine Vastelaovend is compleet zònger optoch. Veur väöl luuj ‘t hoogtepuntj. Waeke, soms maondje is d’r geboewd aan waages en genejd aan pèkskes om Vastelaovesmaondjig met te trèkke met de Grote Optoch. Aansjloetend waere de prieze oetgereik en geit ‘t fees nag doer toet deep inne nach.

nao baove

Vastelaoves deesdig


Vastelaovesdeesdig sjteit in Postert al sinds jaor en daag sinoniem veur Boerebroelig. Alle informasie hie euver kent geer HIE laeze. Ut inj van de Boerebroelig is auch geliek ‘t inj vanne vastelaovend in Postert. Om kloksjlaag 12 oere snachs verzamelt jidderein zich boete veur ’t Biemösj-verbranje.

nao baove

Vastelaoves gonsdig


De gonsdig beteikent dan auch ech ‘t inj vanne vastelaovestied en sjteit tradisjioneel in ‘t teike van ein esjekruutske haole en daonao héringsjèlle.

nao baove